O pasado 28 de Decembro comezou en Muxía o obradoiro dual de emprego promovido polos concellos de Muxía, Camariñas e Vimianzo. Dirixido por Lidia Varela consta de dúas áreas de acción: “actividades auxiliares en conservación e mellora de montes” e “promoción turística local e información ao visitante”.

As primeiras camariñás en recibir a primeira vacina do COVID-19 foron Laura Rodríguez e María Oanes, dúas sanitarias que están a vivir a pandemia dende dous puntos de vista moi distintos e ao mesmo tempo complementarios: Laura traballa dende hai 2 anos e medio dentro da planta cardíaca do CHUAC e dende que se abriu unha UCI para casos COVID fai roldas nela. Hoxe por hoxe leva un mes de continuo nesta UCI para casos críticos de COVID-19. María traballa para a Fundación Adcor dentro da planta de coidados  a rapaces e rapazas con capacidades especiais dende hai 4 anos. Isto fixo que pasara o confinamento con grupo de persoas especialmente sensibles a este tipo de situacións. Dende o Camarinas.eu puxémonos en contacto coas dúas para preguntarlles como foi a experiencia de vacinación e como viviron e viven este tempo de pandemia.

O programa “Xuventude polo Emprego” promovido polos concellos de Camariñas, Vimianzo e Muxía busca a formación e inserción de rapaces e rapazas novas no mundo laboral en distintos eidos. Na procura dese cometido están a realizar dous proxectos relacionados coa vila de Camariñas.

A alcaldesa de Camariñas, Sandra Insua, e o concelleiro de Deportes, Fabián Canosa, clausuraron este venres pasado os campamentos de verán nos que participaron 109 nenos e nenas, divididos entre os Obradoiros de Conciliación e as Actividades Náuticas, que comezaron o 25 de xuño e se levaron a cabo aplicando un completo protocolo de seguridade para evitar contaxios por Coronavirus.

O pasado fin de semana tivo lugar en Culleredo unha nova edición do Parlamento Xove, na que 22 equipos de toda Galicia de 3º e 4º da ESO se enfrontaron entre sí en debates nos que tiñan que argumentar se era conveniente incrementar as sancións a empresas e particulares que cometerán delitos medioambientais.

Este mércores 19 de febreiro, o escritor Fernando Lalana, premio nacional de literatura infantil e xuvenil, visitou o instituto de A Ponte do Porto. Durante hora e media todo o alumnado que pertence aos diferentes clubs de lectura, máis de 60, gozaron das palabras dun dos seus escritores favoritos. O escritor contoulles como empezara na literatura, que lle inspiraba para escribir unha novela, por que se dedicou á literatura infantil-xuvenil e non á de adultos e moitas outras anécdotas que fixeron que o tempo transcorrera máis rápido do desexado. Ao final, Fernando contestou a diferentes preguntas dos lectores e asinou os seus libros. Agradecer á editorial Santillana que puidésemos compartir con Fernando Lalana este tempo, desprazándose ata a Costa da Morte e dándonos a oportunidade de coñecer persoalmente ao creador de tantas historias coas que gozamos.

Como xa vén sendo habitual desde hai unha década, tres exdiputados do Parlamento galego achegáronse este xoves ao IESP Pedra dá Aguia de Camariñas para explicar o funcionamento da institución a alumnos de 3º da ESO. E é de agradecer o seu esforzo por estar no Centro, sobre todo se se teñen en conta as condicións meteorolóxicas tan adversas.

A Asociación Cívica, Cultural, Deportiva e Recreativa “Virxe do Carme de Camariñas” acordou nomear ao IES Pedra da Aguia Camariñán de Honra 2019. Este recoñecemento pretende, con carácter anual e coincidindo coa festividade do Carme de Camariñas, recoñecer á persoa, entidade ou institución que represente mellor os valores camariñáns.  Neste caso a Asociación tivo en conta o traballo dun pequeno centro educativo, radicado no rural e público onde, profesores, pais e alumnos, asumen retos e metas ambiciosas que redunden na formación integral dos xoves camariñáns, na súa promoción persoal e social, e, moi especialmente, na labor de coñecer e difundir no resto da sociedade a Unión Europea e as súas institucións. Este traballo acadou recoñecemento público co seu nomeamento como centro embaixador da Unión Europea.

ste martes 4 de xuño de 2019 os nenos e nenas de sexto de primaria dos CEIP de Camariñas e da Ponte do Porto realizaron unha visita ás instalacións de ASPABER (Asociación de Padres de Discapacitados Psíquicos de Bergantiños). Esta visita está enmarcada dentro do programa que está a levar a cabo o departamento de Asuntos Sociais do Concello de Camariñas dirixido aos escolares de todo o municipio para fomentar a inclusión e normalizar a diversidade que existe na nosa sociedade. Os nenos pasarono moi ben e tiveron a oportunidade de coñecer de primeira man todo o gran traballo que esta asociación está a realizar.

Non sempre toca gañar. E iso é o que lles pasou aos 4 alumnos de 4º da ESO que recentemente participaron na II Olimpíada da Historia, que organiza a Universidade de Vigo no campus de Ourense. En todo caso, o seu concurso foi brillante xa que obtiveron un meritorio 5º posto a nivel autonómico. O evento celebrouse na Facultade de Xeografía e Historia da cidade das Burgas. O noso equipo, composto por Helena, Nerea, Carolina e José e coordinado polo seu profesor de Historia Jacobo Santos, foi de menos a máis durante toda a competición e por momentos liderou un dos grupos que daba acceso ás semifinais. Con todo, despois de 120 preguntas sobre historia mundial, na que se mesturaron imaxes e textos, non puideron alcanzar a meta desexada de estar entre os 4 primeiros. Representa, con todo, todo un éxito polo nivel dos outros representantes e polo feito de ser o único equipo de toda a Costa da Morte presente neste evento.

Espectacular posta en escena a levada a cabo o pasado venres no IESP Pedra da Aguia de Camariñas por todo o alumnado de 3ºESO. Coordinado polas profesoras Liliana Piñeiro, Susana Álvarez e Silvia Lijó, o alumnado mostrou a toda a comunidade educativa os traballos realizados ao longo do curso no programa “O Mundo que Queremos”, un Plan Proxecta da Consellería de Educación.  O antedito programa ten como punto de partida, a difusión dos dezasete Obxectivos 2030 para o Desenvolvemento Sositible da ONU, así como o fomento nas xeracións máis novas, dun sentido de cidadanía global, consciente do seu papel para transformar a sociedade desde o ámbito local. O programa que durou seis meses, centrouse en dous dos obxectivos mencionados por escolla do alumnado: a igualdade de xénero (nº5) e a redución das desigualdades (nº10). Ao longo de todo ese tempo, ambas cuestións foron abordadas de maneira conxunta a través de diferentes obradoiros de radio, vídeo e teatro, así como de charlas e dinámicas pensadas para unha aprendizaxe máis activa. Así mesmo, o proxecto tivo unha vocación interdisciplinar sendo promovido desde as áreas de Xeografía e Historia, Lingua Castelá e a Biblioteca Escolar, e con colaboracións puntuais dos tres departamentos de lingua restantes. A actividade final deste programa consistiu nunha mostra de traballos comentados polo alumnado en intervalos de 20 minutos. Cada un deles ocupou unha estancia distinta do centro, facendo posible un percurso que seguiron todos os grupos-clase do instituto, e nos que o alumnado de 3ºESO, contou con todo o protagonismo para falar do traballo realizado semanas atrás.

Este pasado xoves, 9 de maio, celebrouse o día de Europa, para conmemorar o nacemento da Unión Europea alá pola década dos 50. O IESP Pedra dá Aguia, de Camariñas leva varios anos dando a coñecer aos seus estudantes e a toda a comunidade educativa do municipio a realidade europea, ben mediante viaxes ás institucións comunitarias, ben organizando eventos nos que achega o seu coñecemento aos cidadáns. Desde hai dous anos, somos Escola Embaixadora do Parlamento Europeo e iso implica un maior compromiso con Europa. De feito, redobramos os nosos esforzos para coñecer máis a fondo e difundir a información que nos vén desde Europa.

Os últimos días foron de gran intensidade no IESP Pedra dá Aguia de Camariñas. Os embaixadores junior do ano pasado desprazáronse ata Estrasburgo para participar no certame de Euroscola, xunto a 500 estudantes de 20 países da UE. Durante un día, os nosos alumnos convertéronse en eurodeputados e tiveron que debater sobre temas como a migración, o medioambiente, os dereitos humanos e as próximas eleccións ao Parlamento Europeo.

Xa están de volta os 16 embaixadores junior do IESP Pedra dá Aguia de Camariñas que, durante 5 días, estiveron en Luxemburgo e Frankfurt coñecendo institucións da Unión Europea, que normalmente non son obxecto de visita por estudantes tan novos.

A Asociación de Exparlamentarios do Parlamento de Galicia desenvolve todo un programa de actividades para achegar a realidade da primeira institución de Galicia ao conxunto da cidadanía, moi especialmente as xeracións mais xoves. Mañá xoves, as 11 da mañá, acudirán ao instituto Pedra da Aguia tres exparlamentarios para trasladarlle aos alumnos deste centro educativo a realidade do Parlamento de Galicia dende a visión de quen estivo representándonos alí a todos nos.

Un grupo de ex-alumnos do Ceip de Ponte do Porto nacidos entre 1984 e 1983 despois de 5 anos reunidos nun grupo de facebook para non perder o contacto entre nos. A finais do curso pasado comenzamos a falar de que habería que facer algo porque facía 20 anos que éramos os primeiros alumnos, xunto cos do Ceip de Camariñas, do IES de Ponte do Porto, que así se comezou chamando o instituto IES Pedra da Águia. Así, en Setembro deste mesmo 2018, creamos un grupo novo de Facebook e comezamos a investigar por onde andabamos o resto de alumnos que formaron parte desta quenda inaugural de alumnos do IES Pedra da Águia. Xuntamos 72 alumnos/as do primeiro 3° da ESO. Falamos cos profes que se encargaron de preparar o instituto: Auri Guerrero, Emilio Roca e Silvia Lijó, se se animaban, e claro que se animaron. Costounos atopar unha data que se nos adecuará a todos, XA que uns están en Suíza, Alemania, Lieichestein, Canarias, Mallorca, Méjico, distintos puntos de Galicia e España. Conseguimos reunir a 39 alumnos/as e tres profes. Tiñamos gardados un Dvds dos anos do Instituto e no restaurante permitíronnos proxectamos. Foi unha velada estupenda onde o pasamos de marabilla recordando vellos tempos do instituto e así, xa quedamos para organizar outro encontro no 25 aniversario do IES Pedra da Águia. DIGNA RODRÍGUEZ ROMAR.

O venres 14 de decembro pola tarde, os embaixadores junior do IESP Pedra dá Aguia de Camariñas participaron nunha charla-coloquio que tivo lugar na Deputación da Coruña. Convidados por EuropaDirect A Coruña, os embaixadores junior escoitaron atentamente as argumentacións que sobre o Brexit, a migración e a defensa europea fixeron os eurodeputados galegos Francisco Millán Mon e José Blanco. A continuación, formularon por escrito máis de 40 preguntas, algunha das cales tivo resposta polos europarlamentarios. Non lles soubo a moito, xa que finalizado o debate seguiron preguntando a un dos oradores por máis de 20 minutos.

Este venres 23 de novembro de 2018 organizáronse no noso concello tres manifestacións en contra da violencia de xénero. Estas leváronse a cabo nos centros educativos de CEIP O Areal, CEIP Ponte do Porto e IES Plurilingüe Pedra da Águia. Na celebración destes actos estiveron presentes ademais dos membros da comunidade educativa e o alumnado de ditos centros a alcaldesa Sandra Ínsua e a técnica de igualdade do Concello.

Se a pasada semana foron os embaixadores junior do IESP Pedra dá Aguia os protagonistas coa súa semana de inmersión lingüística en Vos Peares, esta semana foi o seu coordinador, Jacobo Santos, quen acaparou tal distinción. Con motivo dun curso de formación de tres días que tivo lugar no Parlamento Europeo de Bruxelas, e no que participaron ademais doutras tres escolas embaixadoras españolas, máis de 80 escolas embaixadoras europeas, o embaixador senior do Instituto presentou en sociedade e con gran éxito á mascota que elixiron para ser a imaxe en Europa. Trátase dun polbo de nome Caramiña, que vai ataviado cun gorro rematado con encaixe da zona e unha chapa identificativa do Centro. A mascota deixouse fotografar en diferentes lugares e con personalidades como a Directora do Comité Económico Social Europeo, Isabel Caño.

O pasado sábado volveron da súa semana de inmersión lingüística nos Peares, os 24 alumnos de 3º da ESO do IESP Pedra da Aguia de Camariñas. Durante unha semana os rapaces conviviron con outros centros de Galicia unha experiencia única en inglés. Coa sola presenza de monitores nativos e sen a posibilidade de utilizar os seus móbiles, os rapaces non tiveron máis remedio que falar seguido cos compañeiros. Unha experiencia inesquecible e enriquecedora, moi curta segundo eles, pero que continuará para os que foron elixidos para ser os novos embaixadores junior do Parlamento Europeo. Agora tócalles preparar o debate que o 14 de decembro terán cos 4 europarlamentarios galegos na Deputación de A Coruña.